اختر رضاسلیمی

یہ راز صحبتِ خوشبو سے آشکار ہوا

جو ہم کنار ہوا تجھ سے بے کنار ہوا

ملا جو تجھ سے تو ملنے کی چاہ اور بڑھی

قرار آنے پہ میں اور بے قرار ہوا

پڑا ہوا تھا کسی طاقچۂ نسیاں میں

میں تیرے لمس کی حدت سے آشکار ہوا

جنہیں غرور تھا ہونے کا مٹ گئے صاحب!

میں اپنے ہونے کی نفی سے استوار ہوا

کلی کلی کے کلیجے میں بے کلی اتری

چمن تمام ترے بعد سوگوار ہوا

نہ چاہے جانے کا اختر ملال اپنی جگہ

میں اُس کے چاہنے والوں میں تو شمار ہوا